Ladki Bahin Yojana Update : राज्यातील अंगणवाडी सेविका आणि मदतनीस यांच्यासाठी एक आनंदाची बातमी आहे. महिला व बालविकास मंत्री आदिती तटकरे यांनी त्यांच्या अधिकृत ट्विटरद्वारे (ट्विटद्वारे) दिलेल्या माहितीनुसार, या महिला कर्मचाऱ्यांच्या कष्टांचा सन्मान म्हणून त्यांना दिवाळीत भाऊबीजेच्या निमित्ताने प्रत्येकी दोन हजार रुपये भेट स्वरूपात देण्यात येणार आहे. सरकारचा हा निर्णय त्यांच्यासाठी दिवाळीचा आनंद द्विगुणित करणारा ठरणार आहे.
राज्य सरकारकडून ₹४० कोटींचा निधी मंजूर
राज्याच्या महिला व बालविकास मंत्री आदिती तटकरे यांनी सांगितले की, राज्यातील अंगणवाडी सेविका आणि मदतनीस महिला लहान मुलांचे पोषण आणि त्यांच्या आरोग्यासाठी दिवसरात्र मनापासून काम करतात. त्यांच्या या महत्त्वपूर्ण कष्टांचा गौरव करण्यासाठी राज्य सरकारने दरवर्षीप्रमाणे यावर्षीही भाऊबीजेच्या स्वरूपात आर्थिक मदत जाहीर केली आहे.
- भेट रक्कम: प्रत्येक अंगणवाडी सेविका आणि मदतनीस यांना ₹२,००० ची भाऊबीज भेट दिली जाईल.
- मंजूर निधी: या योजनेसाठी शासनाने एकूण ₹४० कोटी ६१ लाख रुपयांचा निधी मंजूर केला आहे.
ही आर्थिक भेट मिळाल्यामुळे अंगणवाडी सेविका आणि मदतनीस यांच्या आर्थिक स्थितीस हातभार लागण्यास मदत मिळेल, असा विश्वास मंत्री तटकरे यांनी व्यक्त केला आहे.
सेविका समाजाची खरी ताकद
मंत्री आदिती तटकरे यांनी अंगणवाडी सेविकांचे महत्त्व अधोरेखित करताना सांगितले की, प्रत्येक अंगणवाडी सेविका ही समाजाची खरी ताकद आहे. त्यांचा दिवाळीचा सण आनंदात आणि उत्साहात साजरा व्हावा, यासाठीच सरकारने हा निर्णय घेतला आहे. भाऊबीजेची ही भेट रक्कम लवकरच अंगणवाडी सेविकांच्या खात्यात जमा केली जाईल, अशी माहितीही त्यांनी दिली.
